FORMANDU NA’IN 31 TUIR FORMASAUN IHA ETA DOM BOSCO-FUILORO
Fuiloro; Formandu nain tolunulu resin ida (31) partisipa formasaun iha Escola Técnica Agrícola (ETA) Dom Bosco Fuiloro ne’ebé fasilita husi International Labour Organization (ILO) no hetan apoiu fundus husi União Europeia.
Diretór Escola Técnica Agrícola (ETA) Dom Bosco Fuiloro Pe. David Sousa, SDB ba Jornal Parde Dijital iha Dom Bosco Fuiloro hateten objetivu husi formasaun ne’e atu fó koñesimentu konaba abilidade iha área téknika agrikutura ba formandu hamutuk na’in tolunulu resin ida (31).
“Objetivu husi formasaun ne’e maka atu aumenta abilidade ba formandu sira nia esperiensia bele implementa no dezenvolve iha ida-idak nia Posto no Suku, materia sira liu husi teoria no Pratika”, dehan Diretor Eskola ETA.
Diretór ETA hahutan, liu husi formasaun ne’e bele hariku liu tan formandu sira nia kapasidade iha area agrikultura nian, tamba maioria populasaun Timor-Leste serbisu nu’udar agricultor. Materia sira formasaun kona-ba “Agroflorestry Skills” mak hanesan mina virjen, mina nu’u, prosesa hahan ba fahi, Insertia, propagasaun hudi, coco fibre, coco peat no adubu órganiku. Formasaun ne’e hala’o durante semana ida,hahú husi Segunda feira to’o Sexta feira (15-19/09/2025.
Hakerek husi: Bernardino Pinto
