MetroFM ; Sekretaria Estadu Komunikasaun Sosiál (SEKOMS) no Ministériu Edukasaun (ME) ho parseiru CHILD FUND fasilita formasaun ba manorin na’in sira hamutuk ruanulu (20) husi eskola públiku no privadu kona-ba publikasaun konteúdu no utilizasaun plataforma online ne’ebé hanaran JORNÁL PAREDE DIJITÁL.
Diretór Jerál SEKOMS Florindo da Costa hateten, kriasaun jornál parede dijitál hanesan dalan ida ba estudante sira oinsá atu aprende di’ak liu tan iha era mudansa teknolojia ne’e.
“Grasa wain tebes tanba servisu hamutuk entre SEKOMS, Ministériu Edukasaun no CHILD FUND, ita hanoin ona kona-ba avansu tenkolojia ne’ebé ohin loron mundu tomak preokupa, sei ita lakohi aproveita ita mak iha kotuk nafatin, entaun SEKOMS hanoin katak mudansa uluk maka iha eskola, ho kriasaun website ne’e agora oinsá maneira uza buat sira ne’e ho seguru” dehan Diretór Jerál hafoin hala’o abertura formasaun ba manorin na’in sira iha Eskola Téknika Informátika Fomento-Díli, kuarta feira (27/08/2025) ne’e.
Fatin hanesan diretór Diresaun Nasionál Eskola Sekundáriu Tékniku Vokasionál husi ME Fernando M. Gama hateten, ME agradese tebes ba SEKOMS tanba inisia ona jornál parede dijitál ne’e hodi publika atividade eskola nian tanba ne’e husu ba manorin na’in sira atu aproveita tempu ho didi’ak hodi bele hetan koñesimentu naton durante tempu formasaun.
“Agradese ba SEKOMS ita konsege halo ida ne’e, kooperasaun di’ak ho edukasaun ita sei halo buat di’ak ruma ba ita-nia eskola sira, ne’eduni ita agradese komesa agora ita komesa hateke dook ona, ida ne’e la’ós iha ne’e de’it sei ba to’o munisípiu sira, agora ita bele aproveita, ha’u sujere ba profesór sira ne’ebé hanorin kona-ba Téknika Informátika no Komunikasaun (TIK) aproveita halo didi’ak no aprende saida maka ita-nia maluk sira fó mai ita” tenik Diretór Fernando.
Reprezentante Child Fund Timor Leste-SWIPE SAFE online Safety Project Coordinator Alexandre P. Mendes informa liuhusi implementasaun Jornál parede dijitál hodi hatama mós programa Swipe Safe oinsá atu asegura no proteje labarik sira iha média online.
“Husi CHILD FUND sente kontente tebtebes tanba bele aproveita programa ida ne’e hodi bele enkaixa ami-nia programa ida ho naran SWIPE SAFE Seguransa online nian, oinsá atu asegura no proteje ita-nia oan sira husi média online, ami hanoin mós atu apoiu nafatin programa ida ne’e atu bele habelar tan programa SWIPE SAFE iha eskola hotu-hotu iha área ne’ebé sai alvu”, tenik Alexandre.
Entretantu Diretór Eskola Ténika Infomátika João Gaio afirma, ho ezisténsia jornál parede dijitál ne’e bele fasilita ona informasaun no atividade eskola idaidak nian.
Formasaun ne’e hala’o durante loron tolu hahú dia 27 to’o 30 agostu 2025, enkuantu partisipante sira mai husi eskola públiku no privadu hamutuk ualu (8) kompostu hosi Eskola Katólika Santa Madalena de Canossa Díli, Colegio Santo Inâcio Loiola Kasait, ESG Annur Díli, ESTV-IT 28 Novembru, ESG 12 Novembru, ETI, ESG Nicolau Lobato, Colegio São José Operário.
Hakerek testu : Celes / Job
Editora : Ana
